कार्ला-खडकाळा जिल्हा परिषद गटातील साडे पाच हजार महिलांसाठी तीर्थदर्शन यात्रा

मावळ – कार्ला-खडकाळा जिल्हा परिषद गटातील साडे पाच हजार महिलांसाठी आयोजित करण्यात आलेली भव्य तीर्थदर्शन यात्रा उत्साहात पार पडली. या यात्रेचे नियोजन महिला सक्षमीकरण, सांस्कृतिक जपणूक आणि समाजातील महिलांच्या एकोप्यासाठी असल्याचे आयोजकांच्या वतीने सांगण्यात आले. ही यात्रा विशेषत: कार्ला, खडकाळा, कामशेत आदी परिसरातील महिलांना घेऊन आयोजित करण्यात आली. यामध्ये महिलांना कोल्हापूर येथील श्री अंबाबाई मातेचे दर्शन तसेच आदमापुर येथे श्री अवधूत सद्गुरु बाबा यात्रेचे दर्शन घडविण्यात आले.

या यात्रेचा मुख्य पुढाकार आशाताई बाबुराव आप्पा वायकर यांनी घेतला. अनेक वर्षांपासून सामाजिक कार्यात सक्रिय असलेल्या आशाताई यांनी या उपक्रमाची जबाबदारी वैयक्तिक सहभागातून सांभाळली. ग्रामीण भागातील महिलांच्या धार्मिक आणि सामजिक सहभागाची ग्वाही देणारी ही यात्रा महिलांमध्ये प्रचंड उत्साह निर्माण करणारी ठरली.

यात्रेच्या शुभारंभप्रसंगी अनेक मान्यवर उपस्थित होते. माजी मंत्री बाळा भेगडे, भाजप किसान मोर्चाचे प्रदेशाध्यक्ष गणेश भेगडे, ज्येष्ठ नेते अविनाश बवरे, संत तुकाराम सहकारी साखर कारखान्याचे माजी संचालक सुभाषराव जाधव, मावळ पंचायत समितीचे माजी सभापती गुलाबराव म्हाळस्कर, तळेगाव दाभाडे नगरपरिषदेचे माजी विरोधी पक्षनेते किशोर भेगडे, तसेच सामाजिक कार्यकर्ते सुरेशराव गायकवाड व रंजना गायकवाड यांनी महिलांना शुभेच्छा देत या यात्रेचा शुभारंभ केला.

या यात्रेसाठी आरोग्य पथक, स्वयंसेवकांची नियुक्ती, भोजन व निवास व्यवस्थेसह सर्व व्यवस्था काटेकोरपणे करण्यात आल्या होत्या. अनेक महिलांसाठी ही पहिलीच मोठी समूह यात्रा होती. त्यामुळे महिलांमध्ये पहाटेपासूनच उत्साह, आनंद आणि भक्तिभाव ओसंडून वाहताना दिसला.

प्रास्ताविकामध्ये बोलताना आशाताई वायकर म्हणाल्या, “गावातील महिलांनी घरकाम, शेती, कुटुंब आणि समाजाची जबाबदारी सांभाळताना स्वत:साठी वेळ काढण्याची संधी बऱ्याचदा मिळत नाही. तीर्थदर्शन यात्रा म्हणजे केवळ धार्मिक कार्यक्रम नसून एकमेकांशी मनमोकळा संवाद, अनुभवांची देवाणघेवाण आणि भावनिक आनंदाचा क्षण आहे. या यात्रेतून महिलांना मानसिक आणि आध्यात्मिक ऊर्जा मिळावी, हेच आमचे ध्येय आहे.”

तसेच या उपक्रमाला पाठिंबा देणाऱ्या विविध मान्यवरांनीही महिलांच्या सक्रिय सहभागाचे कौतुक केले. सामाजिक बांधिलकीचे कार्य सकारात्मक वृत्तीने करण्याची गरज त्यांनी अधोरेखित केली. ग्रामीण भागातील महिलांनी एकत्र येऊन समाजातील प्रगतीसाठीही पुढाकार घेण्याचे आवाहन यावेळी करण्यात आले.

श्री अंबाबाई मंदिर परिसरात व आदमापुर आश्रमात महिलांनी भक्तिभावाने दर्शन घेतले. अनेक महिलांनी आपल्या अनुभूतीत ही यात्रा विसरण्यासारखी नाही, भावनिक समाधान देणारी असल्याचे सांगितले. काही महिलांनी पहिल्यांदाच कोल्हापूर व आदमापुर दर्शन केल्याचा आनंद व्यक्त केला.

यात्रेच्या शेवटच्या क्षणापर्यंत शिस्त, उत्साह, भक्तिभाव आणि एकोपा कायम दिसून आला. या यात्रेने केवळ धार्मिक दर्शन नव्हे, तर महिला सक्षमीकरण व एकात्मभावाचे सामर्थ्य दाखविले आहे.

या यात्रेमुळे कार्ला-खडकाळा गटातील महिलांमध्ये नवचैतन्य, आनंद आणि सामाजिक एकोप्याचा मजबूत संदेश रुजला. आशाताई वायकर यांनी या यात्रेला भविष्यातही सातत्य देण्याचा विश्वास व्यक्त केला.