कान्हे (प्रतिनिधी) — ग्रामपंचायत कान्हे हद्दीतील गट क्रमांक 238 मधील सरकारी गायरान जागेचा सुयोग्य वापर करत येथे फळबाग लागवड करण्यात आली असून या उपक्रमामुळे परिसरात सकारात्मक बदल घडताना दिसत आहे. पारंपरिक पद्धतीऐवजी आधुनिक शेती तंत्रज्ञानाचा अवलंब करत सर्व झाडांना ठिबक सिंचन पद्धतीचा वापर करण्यात आला आहे.
या फळबागेमध्ये केशर आंबा, नारळ, चिकू आणि पेरू यांसारख्या विविध फळझाडांची नियोजनबद्ध लागवड करण्यात आली आहे. ठिबक सिंचनामुळे पाण्याची मोठ्या प्रमाणात बचत होत असून झाडांची वाढही जोमदारपणे होत आहे. कमी पाण्यात अधिक उत्पादन घेण्याचा हा प्रयत्न असल्याने या उपक्रमाकडे परिसरातील शेतकऱ्यांचे लक्ष वेधले जात आहे.
सरकारी गायरान जमिनीचा अशा प्रकारे उपयोग केल्यामुळे निष्प्रभ असलेली जमीन आता उत्पन्नाचे साधन बनण्याच्या दिशेने वाटचाल करत आहे. तसेच, पर्यावरण संवर्धन आणि हरित क्षेत्र वाढीसही या उपक्रमामुळे हातभार लागत आहे.
ग्रामपंचायत प्रशासनाच्या या पुढाकाराचे स्थानिक नागरिकांकडून स्वागत करण्यात येत असून भविष्यात या फळबागेमधून ग्रामपंचायतीला आर्थिक उत्पन्नही मिळण्याची अपेक्षा व्यक्त केली जात आहे. यामुळे गावाच्या सर्वांगीण विकासाला चालना मिळणार असल्याचे मत ग्रामस्थांनी व्यक्त केले आहे.
