🎤 “निवेदनाची किंमत ओळखा” — मावळातील निवेदकांची सन्मान व मानधनासाठी जोरदार मागणी

mavalchaufer@gmail.com 3 days ago

0 7 1 minute read

Spread the love

वडगाव मावळ – लाखो रुपयांच्या खर्चात होणाऱ्या भव्य लग्न सोहळ्यांची शोभा वाढविणारा निवेदक मात्र दुर्लक्षितच राहतो, अशी खंत व्यक्त करत मावळ तालुका निवेदक संघाने निवेदकांना योग्य मानधन व सन्मान मिळावा, अशी ठाम मागणी पत्रकार परिषदेत केली.

वडगाव येथील विश्रामगृहात झालेल्या पत्रकार परिषदेत संघाचे संस्थापक रामदास वाडेकर, गणेश विनोदे, अध्यक्ष अतुल सातकर, कार्याध्यक्ष रमेश जाचक यांच्यासह तानाजी पडवळ, संजय गाडे, शांताराम ढाकोळ, चंद्रकांत घारे, संतोष राक्षे, भानुदास जांभुळकर, जालिंदर शेटे, अनंता आंद्रे, शरद सावंत, प्रवीण मुऱ्हे, प्रवीण ढोरे, अनंता कुडे, अमोल केदारी, वैभव पिंपळे, संदीप तिकोने, दिलीप गावडे, संदीप शिंदे, राजेश मोहिते, नागेश मरगळे, योगेश पिंगळे, योगेश माझीरे, रामदास चांदगुडे, रंगनाथ चव्हाण, सतीश गराडे, अंकुश लोहोट, संजय बनसोडे, मंगेश शेलार, तुषार जगताप, विकास लालगुडे आदी उपस्थित होते.

यावेळी निवेदकांनी आपली व्यथा मांडताना सांगितले की, तालुक्यातील अनेक तरुण आणि ज्येष्ठ मंडळी केवळ आवड व सामाजिक बांधिलकीतून कोणत्याही मोबदल्याची अपेक्षा न ठेवता विविध कार्यक्रमांमध्ये निवेदन करतात. दोन-दोन तास सलग निवेदन करूनही त्यांचा साधा सन्मान किंवा नावाचा उल्लेखही केला जात नाही.निवेदनादरम्यान एखाद्याचे नाव चुकले किंवा राहिले, तर संबंधितांकडून त्वरित नाराजी व्यक्त केली जाते. अनेकदा वादावादीही होते. मात्र चांगल्या कामाबद्दल कधीही कौतुक होत नसल्याची खंत निवेदकांनी व्यक्त केली.

• बाहेरील निवेदकांना मोठी बिदागी विशेष म्हणजे इतर तालुक्यांमधून बोलावलेल्या निवेदकांना ५ हजार ते २० हजारांपर्यंत मानधन दिले जाते. त्यांच्या छोट्या चुका दुर्लक्षित केल्या जातात. परंतु स्थानिक निवेदकांना मात्र कोणताही मोबदला न देता त्यांच्यावर टीका केली जाते, असेही त्यांनी सांगितले.

• मानधनाचा सवाल लग्न समारंभासाठी सजावट, फोटोग्राफी, सोशल मिडिया रिल्स यांसारख्या गोष्टींवर मोठ्या प्रमाणात खर्च केला जातो. मग कार्यक्रमाची उंची वाढवणाऱ्या निवेदकाला योग्य मोबदला का मिळू नये? असा सवाल संघाने उपस्थित केला.

•सामाजिक बांधिलकी कायम यापुढे लग्न समारंभांमध्ये निवेदकांना योग्य मानधन व सन्मान देण्याची मागणी करण्यात आली. मात्र दुःखद प्रसंग, सामुदायिक विवाह किंवा गरजू कुटुंबातील कार्यक्रमांमध्ये विनामोबदला सेवा देण्याची भूमिका निवेदक संघाने स्पष्ट केली.मावळातील निवेदकांनी आता आपली भूमिका ठाम करत “कामाचे योग्य मूल्य मिळालेच पाहिजे” असा आवाज बुलंद केला आहे. समाजानेही या मागणीचा गांभीर्याने विचार करणे गरजेचे ठरत आहे.