टाकवे येथे देशातील पहिली ‘ॲडास टेस्ट सिटी’ उभारली; मावळचा वाहन तंत्रज्ञान नकाशावर ऐतिहासिक ठसा

वडगाव मावळ : मावळ तालुक्यातील टाकवे परिसरात देशातील पहिली ‘ॲडास (ADAS – Advanced Driver Assistance Systems) टेस्ट सिटी’ साकारण्यात आली असून, भारताच्या वाहन तंत्रज्ञान क्षेत्रात ऐतिहासिक पाऊल टाकले गेले आहे. ऑटोमोटिव्ह रिसर्च असोसिएशन ऑफ इंडिया (ARAI) यांच्या पुढाकाराने उभारण्यात आलेल्या या अत्याधुनिक केंद्राचे सादरीकरण ‘ॲडास शो २०२६’च्या माध्यमातून वाहन उद्योग प्रतिनिधी आणि पत्रकारांसमोर करण्यात आले.

केंद्रीय अवजड उद्योग मंत्रालयाच्या अखत्यारित कार्यरत असलेल्या ARAI ने सुमारे २० एकर क्षेत्रावर ही ‘स्मार्ट ॲडास टेस्ट सिटी’ विकसित केली आहे. भारतीय रस्ते व वाहतूक परिस्थिती लक्षात घेऊन उभारण्यात आलेले हे देशातील पहिलेच समर्पित चाचणी केंद्र आहे. येथे ॲडव्हान्स्ड ड्रायव्हर असिस्टन्स सिस्टीम्ससाठी सुरक्षित, नियंत्रित आणि पुनरावृत्तीयोग्य चाचणी वातावरण उपलब्ध करून देण्यात आले आहे. त्यामुळे वाहन उत्पादकांना भारतीय परिस्थितीनुसार त्यांच्या तंत्रज्ञानाची अचूक पडताळणी व प्रमाणिकरण करणे अधिक सुलभ होणार आहे.

ही सुविधा सिम्युलेशन, क्लोज्ड ट्रॅक टेस्टिंग आणि सार्वजनिक रस्त्यांवरील चाचण्यांमधील दरी कमी करण्याचे महत्त्वपूर्ण कार्य करणार आहे. परिणामी, वाहन सुरक्षेत लक्षणीय वाढ होऊन अपघातांचे प्रमाण कमी करण्यास मदत होणार असून भविष्यातील स्मार्ट मोबिलिटीला चालना मिळणार आहे.

‘ॲडास शो २०२६’चे आयोजन ARAI च्या सहकार्याने करण्यात आले होते. या कार्यक्रमाला वरिष्ठ सरकारी अधिकारी, देश-विदेशातील वाहन उत्पादक, तंत्रज्ञ, संशोधक तसेच टियर-१ पुरवठादार मोठ्या संख्येने उपस्थित होते. यावेळी ARAI चे संचालक डॉ. रेगी मथाई, मोबिलआयचे उपाध्यक्ष एली लुस्किन, एचएआर टेक्नॉलॉजीजचे अभिजित सेनगुप्ता तसेच ARAI चे सदस्य फरीद अहमद यांनी पत्रकारांशी संवाद साधला.

डॉ. रेगी मथाई यांनी सांगितले की, ॲडास तंत्रज्ञान रस्ते सुरक्षेसाठी अत्यंत महत्त्वाची भूमिका बजावणार असून सुरक्षित, स्मार्ट आणि शाश्वत गतिशीलतेकडे वाटचाल करण्याच्या ARAI च्या वचनबद्धतेचे हे केंद्र प्रतीक आहे. ‘कॅपिटल गुड्स’ योजनेअंतर्गत केंद्र सरकारच्या पाठबळामुळे या प्रकल्पाची उभारणी शक्य झाल्याचे त्यांनी नमूद केले.

या ‘ॲडास शो २०२६’मध्ये ऑटोमॅटिक क्रूझ कंट्रोल, ऑटोमॅटिक इमर्जन्सी ब्रेकिंग, लेन डिपार्चर वॉर्निंग, ब्लाइंड स्पॉट डिटेक्शन, ट्रॅफिक साइन रिकग्निशन, ड्रायव्हर मॉनिटरिंग, पादचारी शोध, नाईट व्हिजन, ट्रॅफिक जॅम असिस्ट आणि ऑटोमॅटिक पार्किंग यांसारख्या अत्याधुनिक प्रणालींची थेट प्रात्यक्षिके सादर करण्यात आली.

टाकवे येथे उभारण्यात आलेल्या या प्रकल्पामुळे भारताला ॲडास विकास आणि प्रमाणिकरण क्षेत्रात जागतिक स्तरावर आघाडी घेण्याची संधी उपलब्ध झाली आहे. याचा थेट फायदा भारतीय वाहन उत्पादक, संशोधक आणि भविष्यातील स्मार्ट मोबिलिटी उपक्रमांना होणार आहे. तसेच या उपक्रमामुळे मावळ तालुका आणि पुणे जिल्हा देशाच्या वाहन तंत्रज्ञान नकाशावर ठळकपणे अधोरेखित झाला असून, स्थानिक स्तरावर रोजगारनिर्मिती, संशोधन आणि औद्योगिक विकासालाही नवे बळ मिळणार आहे.